Асуулт хариулт

Эмэгтэйчүүдийн хавдрын төв

Q.Өндгөвчний хорт хавдрын мэс заслын дараа жирэмслэх боломжтой юу?

Хавдрыг анхан шатанд илрүүлсэн тохиолдолд, жирэмслэх чадвартай эмэгтэйн өндгөвчинд үүссэн хорт хавдрыг(үржлийн эсийн хавдар) эмчлэхдээ нэг талын өндгөвчийг авсны дараа химийн эмчилгээ хийдэг. Энэхүү эмчилгээг хийж бүрэн эдгэрсэн тохиолдолд жирэмслэх болон хүүхэд төрүүлэх боломжтой.
Мөн түүнээс гадна өндгөвчийг хадгалж үлдээд умайг авах, эсвэл умайг үлдээгээд өндгөвчийг авсан тохиолдолд ч гэсэн жирэмслэх болон хүүхэд төрүүлэх олон янзын арга бий.
Q.Умайн хүзүүний хорт хавдар тусвал умайг авах ёстой юу?

Умайн хүзүүний хорт хавдрын өөрчлөлтийн байдлаас хамаарч умайг авах юм уу авахгүй байж ч болдог.
Умайн хүзүүний хорт хавдрыг мэс заслын, цацраг туяаны, химийн аргаар эмчилдэг.
Мэс заслын арга нь дотроо олон янз бөгөөд анхан шатанд нь илрүүлбэл умайг авахгүйгээр эмчилж бүрэн эдгээх боломжтой.
Тиймээс тогтмол шинжилгээ хийлгэх нь чухал.
Q.Өндгөвчинд уйланхай байна гэсэн. Аюултай юу?

Өндгөвчний уйланхай нь өндгөн эс боловсрох үед бий болсон цэврүү хагаралгүй томрох юм уу, өндгөн эс боловсрон гарсан ормон дээр цус бүлэгнэсэн тохиолдолд бий болдог.
Жирэмслэх чадвартай эмэгтэйчүүдийн хувьд ихэнхдээ уйланхай нь өөрөө шимэгдэн алга болдог. Харин цэвэршиж байгаа эмэгтэйчүүдийн хувьд улам томрон ургах юм уу хортой болж магадгүй тул заавал авахуулж, эдийн шинжилгээ хийлгэхийг зөвлөж байна.
Мөн түүнчлэн жирэмслэх чадвартай эмэгтэйчүүдийн уйланхай хортой хавдар болох магадлалтай тул эх барих, эмэгтэйчүүдийн эмчээс зөвлөгөө авч зохих эмчилгээ хийлгэх нь чухал юм.
Q.Хорт хавдрын химийн эмчилгээ хийлгэвэл толгойн үс унадаг гэсэн, үнэн үү?

Бүх химийн эмчилгээ толгойн үс унахад хүргэдэггүй. Химийн эм тарианы үйлчилгээ харилцан адилгүй хэдий ч ихэнх нь толгойн үс унах, шингэрэх зэрэг нөлөө үзүүлж болох юм.
Гэсэн хэдий ч энэ нь байнга унана гэсэн үг биш бөгөөд голдуу химийн эмчилгээ хийсний дараах 1~2 долоо хоногт унаж эхлээд 2 сарын турш нэлээн их хэмжээгээр унадаг. Химийн эмчилгээ дуусмагц дахин ургадаг.
Тиймээс хэт их санаа зовох хэрэггүй. Үс их унасан үед хиймэл үс, малгай, алчуур зэргийг зүүж хэрэглээрэй. Сэтгэл зүйн таагүй байдлаа даван туулахад И-Хуа их сургуулийн Эмэгтэйчүүдийн хорт хавдар судлалын эмнэлэг танд туслах болно.
Q.Химийн эмчилгээг бүгдийг нь эмнэлэгт хэвтэж байж хийлгэх ёстой юу?

Үгүй.
Эмчилгээг эмнэлэгт хэвтэж хийлгэх ёстой тохиолдол бий хэдий ч химийн эмчилгээ, эм тариа ихэд хөгжсөн өнөө үед тарианы өрөөнд тариагаа хийлгэчихээд тухайн өдөртөө гэртээ харих боломжтой төдийгүй уудаг химийн эм ч бас бий.
И-Хуа их сургуулийн Эмэгтэйчүүдийн хорт хавдар судлалын эмнэлэг нь хорт хавдартай өвчтөнүүдэд зориулсан цэвэрхэн, тав тухтай тарианы өрөө тусгайлан бэлдсэн байгаа.
Судасны асуудалтай өвчтөнүүдэд сэтгэл тайван үйлчлүүлэх боломжийг олгох нарийн мэргэжлийн тарианы сувилагч байнга бэлэн ажилладаг.
Q.Эмэгтэйчүүдийн хорт хавдрын мэс засал хийлгэвэл бэлгийн ажил хийж чадахгүй болдог уу?

Үгүй.
Умайн хорт хавдартай өвчтөн эмнэл зүйн үе шатаас хамаарч умайг бүхэлд нь авах юм уу умайг үндсээр нь авах мэс засал хийдэг. Гэхдээ умайгүй боллоо гээд бэлгийн ажил хийхэд бэрхшээл учирсан тохиолдол гараагүй.
Ихэнхдээ мэс засал хийлгэснээс хойш 6 долоо хоногийн дараагаас эхлэн бэлгийн ажил хийх боломжтой боловч эмчлэгч эмчдээ үзүүлж зөвлөгөө аваарай.
Умайг үндсээр нь авах мэс заслаар үтрээний ихэнх хэсгийг тайрч авдаг тул үтрээ богинссоноос болж бэлгийн ажил хийхэд таагүй санагдаж магадгүй.
Гэхдээ үтрээний тос хэрэглэнгээ байнгын бэлгийн харьцаанд ороод байвал үтрээ боломжийн хэмжээгээр уртасдаг тул бага зэрэг таагүй байсан ч гэсэн тодорхой хугацааны дараа сайжрах болно.
Умайн хүзүүний хорт хавдартай өвчтөн цацраг туяа эмчилгээ хийлгэж байх үед үтрээний салст бүрхүүлийн үрэвслээс болж цус алдах магадлалтай тул туяа эмчилгээ дууссаны дараа 2 долоо хоногоос 1 сар өнгөртөл бэлгийн харьцаанд орох хэрэггүй.
Эмчилгээний дараа бэлгийн харьцаанд ороход үтрээний нарийсал, хуурайшил зэргээс болж өвдөлт мэдрэгдэх болзошгүй.
Үтрээ тэлэх тос зэрэг тослог хэлбэрийн эмэгтэй дааврын эмчилгээний эм бэлдмэлийг хэрэглэвэл дээрх таагүй мэдрэмж арилна.
Олон хүмүүс өвчин хүндрэхээс эмээж бэлгийн харьцаанд орохоос зайлсхийдэг. Бэлгийн харьцаа нь өвчин сэдрэх, хүндрэх шалтгаан болдоггүй.
Харин бэлгэвч хэрэглэж байгаарай.
Бэлгийн амьдралаа хэвийн байдлаар эхлүүлсэн бол энгийн хүмүүсээс өөр ямар нэгэн хязгаарлалт тавигдахгүй.
Q.Эмэгтэйчүүдийн хорт хавдрын мэс засал хийлгэсэн юм. Биеийн тамираар хичээллэж болох уу?

Хөнгөн дасгал хөдөлгөөн нь мэс заслын дараа хурдан эдгэрч тэнхрэхэд тус болдог.
Эхний 1 сард өглөө орой тогтмол 30 минутаас 1 цагийн турш зөөлөн алхах хэрэгтэй.
Дараагийн шатанд усанд сэлэх, дугуй унах, ууланд явах, гольф тоглох зэрэг хөнгөн дасгал хөдөлгөөнийг хийж болно. 3 сарын дараа өөрийн хичээллэдэг байсан биеийн тамирын ихэнх төрлөөр хичээллэж болно.
Харин мэс заслын дараа химийн болон цацраг туяаны эмчилгээ хийлгэж байгаа бол салхинд алхахаас бусад төрлийн дасгал хөдөлгөөн хийхгүй байсан нь дээр.
Манай И-Хуа их сургуулийн Эмэгтэйчүүдийн хавдар судлалын эмнэлэгт хорт хавдартай өвчтөний сэргээн засах эмчилгээгээр мэргэшсэн эмч профессор ажилладаг бөгөөд өвчтөнийг сэргээн засаж, хэвийн амьдралдаа эргэн ороход нь туслах дасгал хөдөлгөөнийг зааж сургаад зогсохгүй хорт хавдрын мэс заслын дараа тунгалгийн хавангийн өвдөлтөөс шаналж байгаа өвчтөнүүдэд туслах дасгал хөдөлгөөнийг зааж өгдөг.
Q.Химийн эмчилгээний үед эрүүл мэндийн нэмэлт бүтээгдэхүүн хамт хэрэглэвэл илүү сайнаар нөлөөлөх биш үү?

Цацраг туяа болон химийн эмчилгээний үед гэдэсний үйл ажиллагаа суларсан байх магадлалтай тус аль болох цочроох хоол хүнснээс зайлсхийх хэрэгтэй.
Мөн энэ үед ардын уламжлалт эмчилгээ болон эрүүл мэндийн нэмэлт бүтээгдэхүүнийг хориглосон нь дээр.
Эдгээр аргууд дундаас шинжлэх ухаанаар үр дүнтэй гэж нотлогдсон нь бараг үгүй бөгөөд эмнэлгээс хийж байгаа эм тариатай харилцан нөлөөлж, эмчилгээний үр дүнг бууруулах, элэг болон бөөрний үйл ажиллагааг муутгах зэрэг гаж нөлөө үзүүлэх магадлал өндөр.
Манай И-Хуа их сургуулийн Эмэгтэйчүүдийн хавдар судлалын эмнэлэгийн хорт хавдартай өвчтөний шим тэжээлээр мэргэшсэн нарийн мэргэжлийн хоол зүйч эмчилгээнд тустай, дархлаа сайжруулах хоолны дэглэм голлосон өндөр уураг, антиоксидант амин дэм(vitamin C, E), эрдэс бодис хангалттай авах боломжтой цэсийг боловсруулан гаргаж хэвтэн эмчлүүлж байгаа өвчтөнүүдэд тус нэмэр болохоор хичээн ажиллаж байна.
Q.Гэр бүлийн маань нэг гишүүн хорт хавдартай гэж оношилогдсон. Юун түрүүнд яах ёстойгоо мэдэхгүй их сандарч байна.

Манай И-Хуа их сургуулийн Эмэгтэйчүүдийн хавдар судлалын эмнэлэг нь хорт хавдартай өвчтөн төдийгүй тэдний гэр бүлийнхэнд шаардлагатай заавар зөвлөгөөг өгдөг.
Гэр бүлийн гишүүдийн тань хэн нэг нь хорт хавдартай болсон бол ямар нөхцөлд ямар арга хэмжээ авах ёстойг зааж зөвлөөд зогсохгүй мэргэшсэн нийгмийн ажилтан бусад янз бүрийн нийгмийн байгууллагуудтай холбож өгөх хэвийн амьдралдаа эргэн орох талаар мэдээлэл өгнө.
Хорт хавдартай өвчтөнүүд дунд амьдралын боломж муугаас мэс заслын төлбөр болон цаашдын эмчилгээгээ хийлгэх төлбөрөө төлөх чадамжгүй хүмүүст ивээн тэтгэгч байгууллагын туслалцаатайгаар мөн бусад арга замыг эрэлхийлэн эмчилгээний төлбөр төлөхөд тусладаг.